NOVA GALICIA EDICIÓNS

Nova Galicia Edicións, editorial fundada en Vigo no ano 1984, naceu co obxectivo de recuperar documentos históricos para a súa edición facsimilar como poden ser A Nosa Terra (histórica), Galeuzca, A Fouce...e de promover a nosa arte e cultura tanto dentro do noso país como máis alá das nosas fronteiras o que nos levou, no ano 1997, a comezar un proxecto, Artistas Pintores, Artistas Arquitectos e Artistas Escultores, que é a día de hoxe unha realidade recollida en 30 volumes dedicados aos artistas máis importantes de todos os tempos, pintores, escultores e arquitectos (máis de 500 en total) Editamos tamén catálogos de exposicións e monografías de grandes artistas, o que nos levou a gañar no ano 2004 o Premio ao Libro Mellor Editado na categoría de Arte, pola nosa obra “Quessada. Arte e liberdade”. As nosas publicacións inclúen ademais outras obras divulgativas sempre relacionadas coa nosa cultura.

Comezando novas liñas editoriais fixo a súa primeira incursión no mundo do libro infantil e xuvenil no ano 2003 publicando non só narrativa e libros ilustrados, senón tamén libros didácticos destinados tanto aos rapaces como a seus pais e mestres.

Nova Galicia apostou polo libro ilustrado infantil creando unha nova colección “Contos de mamá”, que abre un mundo cheo de fantasía para os máis pequenos, para que a lectura se transforme nunha auténtica diversión e que eles mesmos descubran unha verdadeira afección a ler. Os textos van dirixidos a nenas e nenos que se inician na lectura, por este motivo están escritos nunha linguaxe sinxela, cun texto breve e facilmente comprensible. Teñen unha extensión limitada e van acompañados por un gran número de ilustracións para unha mellor comprensión lectora xa que  non só pretenden contar unha historia, senón tamén que os rapaces capten os valores que o libro agocha nas súas páxinas.

Cabe subliñar os libros sobre valores que conforman as nosas coleccións “Que me dis de...”, “Saber para vivir” e “Saber para crecer” que tratan temáticas de actualidade, de gran interese en todos os sectores da sociedade. De extensión curta e cunha linguaxe actual, de agradable lectura, deseñados e presentados cunha ampla imaxe visual fácil de entender pola xente nova. Abranguen temas de actualidade que preocupan a pais, educadores e a sociedade en xeral, temas como o consumo de drogas, de alcohol, o tabaco, a violencia escolar, o respecto á igualdade...todos eles presentados desde un punto de vista didáctico, amosando cales son estes problemas e intentando aportar os medios para evitalos e as posibles solucións aos mesmos.

Nova Galicia Edicións está a facer unha proxección da arte e a cultura coa súa presenza nas principais feiras do libro de todo o mundo. Leva exportando libros desde o ano 1997 chegando a países tan distantes como China, Taiwan, Sudáfrica, México, Irán, Porto Rico...E ten feito coedicións con países como Brasil e Holanda.