Que é iso do portal web M8 por ler?
É un proxecto moi ambicioso no que queremos contar coa implicación de toda a industria editorial galega.
Trátase dun portal web informativo da nosa literatura, no que volcamos todas as bases de datos das que dispoñemos e no que as editoras poden subir as novidades e complementar a información das súas obras antigas.
Tamén as autoras e autores poden actualizar a información dos seus perfís dun xeito directo.
Pero iso xa existe… Cal é a novidade?
Que vai ser interactivo.
Amais das editoras, os usuarios e usuarias da web tamén van ter un perfil persoal co que poder reseñar, recomendar e valorar os libros.
Isto permitirá a creación de recomendacións personalizadas, ránkings e mesmo a interacción entre usuarias.
Quen son os usuarios e usuarias?
As lectoras e lectores.
A páxina é un lugar de encontro, intercambio e conversa arredor do libro galego.
Hai espazo para vender libros ou materiais relacionados co libro?
Non.
É un espazo sen ánimo de lucro, pensado para promocionar a nosa literatura e gozar en compañía de persoas con intereses similares.
Sen ánimo de lucro significa gratis?
Non exactamente.
A implementación e a promoción do portal teñen un custo elevado que a Fundación Cultural Galega Xistral asume das súas contas.
Calquera colaboración con este proxecto é sempre benvida.
