Collín onte na biblioteca Pantasmadas, a novela coa que Andrea García Martínez quedou finalista no Premio Merlín en 2025 e non puiden evitar poñer ao lado a lectura coa que estaba para deixarlle paso a esta. Pantasmadas é unha novela infantil que presenta uns personaxes do máis interesante: o avó Seronio que é xa o único habitante de Treboeiro e a quen a súa filla Lena e a súa familia queren levar para a cidade. Seronio vive terriblemente afastado do resto do mundo nunha casa na que convive con diversas pantasmas que teñen... digamos certas peculiaridades. Para empezar, o correo está a cargo do xabarín Marmelo, tamén temos a Pánfilo, a Xurxo Reberete, dona Clementina e á avoa Petunia. Nin tan mal como compañía para Seronio! Ao saber que Lena, o seu home e o seu fillo Martiño veñen para levar canda eles ao pobre Seronio, as pantasmas deciden tomar medidas aínda que non sempre lles saia todo como pensaban. Divertidísimas as pantasmas e moi lograda a trama que remata con algunha sorpresiña pois o mundo das pantasmas parece estar sempre aberto a novas incorporacións. Unha novela moi divertida e na que se agradecen as abundantes ilustracións tamén da autora. Creo que é unha boa idea que se conte con tantas ilustracións que apoian moito ao texto e contribúen a facilitar a lectura daqueles lectores que se asusten con moito texto por páxina. Pode ser unha lectura adecuada para nenas e nenos de 8 a 12 anos que, en todo caso non deberían ter medo ao ver que hai pantasmas polo medio pois é un libro do máis entretido e ameno.