PACO LÓPEZ-BARXAS

Francisco López Rodríguez, coñecido co heterónimo Francisco López Barxas, nado en Ponte Barxas (Padrenda) o 24 de abril de 1952, é un escritor, xornalista e crítico galego.

Licenciouse en Filoloxía Hispánica pola Universidade Complutense de Madrid e viviu nesta cidade durante varios anos, traballando como crítico literario, dirixindo revistas de literatura e tamén como profesor de lingua e literatura española. Publicou en nos xornais Diario Informaciones, El País, El Sol, El Mundo, La Voz de Galicia, El Correo Gallego, La Vanguardia e nas revistas Ozono, Nueva Estafeta, Ínsula, Quimera, Leer, Grial, Anthropos, El Ciervo e Album de las Letras y las Artes... Foi redactor Xefe da Revista Argumentos (1978), Director de Publicacións e membro do Consello Reitor da Universidade Antonio de Nebrija.

A comezos da década de 1990 regresou a Galicia para encargarse da dirección do Xornal Diario, un medio editado en Pontevedra que desapareceu en 1992.

En 2000 conseguiu un posto como editor do informativo Bos días, da Televisión de Galicia, traballo no que continuou ata 2003, cando ascendeu ao cargo de redactor xefe de informativos desa cadea. Deixou o posto en 2005. En 2009, logo da vitoria electoral de Alberto Núñez Feijóo, foi designado director xeral de Promoción e difusión cultural, dentro da consellería de Cultura e Turismo. Meses despois, ao reestruturarse as competencias, López Barxas pasou a ser director xeral do Libro, bibliotecas e arquivos, posto no que permaneceu até o seu cesamento en xaneiro de 2012.