Que fácil é caer vítima do grupo de iguais e intentar facer o mesmo cós demais intentando ser coma eles esquecéndonos de ser nós mesmos ou de cultivar as nosas virtudes, por moito que sexan diferentes ás do resto. Iso é o que lle pasa á nosa Elvira. Neste álbum ilustrado de Lucía Cobo publicado por Antela Editorial atopamos a este pitiño de avestruz que non contento con que súa nai teña as ás máis grandes ou ela mesma poida xogar ao baloncesto ou tocar música coma ninguén, segue coa teima de voar coma o resto de aves da súa escola. Por sorte sempre conta con súa nai que a ampara agarimosamente tras cada desencanto. Un álbum ilustrado ideal para ir aprendendo que ser igual cós demais non é sempre o mellor e que ser un mesmo pode ser a mellor das ideas. Bonitos textos, breves e cunha tipografía fácil de ler para os lectores que se inicien, pero o mellor son as ilustracións: todas esas aves variadas para ir aprendendo os seus nomes, esa mamá avestruz tan agarimosa (sempre co seu colar de perlas, iso si). Imposible non collerlle cariño a Elvira. Precioso libro!