Este libro-xogo é unha obra moi particular. O lector/xogador necesitará un par de dados e unha copia da ficha persoal que inicia o libro para evitar escribir nel pois poderá facer máis lecturas diferentes no futuro. Os capítulos veñen numerados e ao rematar cada un deles dásenos a opción entre saltar a dous capítulos diferentes segundo a nosa elección dentro da narración de forma que a nosa lectura pode ser moi diferente cada vez que xoguemos ou simplemente diferente á lectura que outros fagan. Cal é o argumento? Debemos vencer a Baba Iagá antes de que a fada Polvídea, última esperanza de Trisol, sucumba ao Apagamento que vai acabando con elas. Así iniciamos o noso camiño elixindo entre o camiño da espada e o da maxia na que será a nosa primeira decisión na lectura. Sinto dicir que o meu primeiro intento deu cun final infrutuoso e precipitado sen conseguir o meu propósito. Do que se trata é de seguir o noso instinto cada vez para dar co camiño correcto entre feitizos, maxia e personaxes fantásticos. Máis ca un libro-xogo é case un libro-labirinto no que hai que ler e ler buscando cada vez chegar a bo porto polo ben de Polvídea. Non dixen nada aínda das ilustracións pero non sería xusta se non o fixese. Gustoume moito como veñen integradas no texto pero sobre todo a portada, que me parece incrible. Un gran traballo de Bea Gregores. Loxicamente as lectoras e lectores deberán ter fluidez na lectura pero dado que os capítulos son breves e o ben narrado que está, creo que pode ser un libro adecuado desde os 8 anos e ata os 13, loxicamente dependendo dos gustos e nivel lector de cada persoa. Paréceme un libro fantástico como agasallo e creo que acabarei mercando máis de un porque este libro ten todo o que se busca nunha lectura infantil: divertir, entreter e facer da lectura algo divertido! Necesitamos máis libros así!