Que pode pasar un día de chuvia? Seguramente poucas cousas pero iso non é o que lles pasou a Espe e a Rino un día de chuvia que estaban no parque sen paraugas con "auga por arriba, auga por abaixo, auga pola esquerda e auga pola dereita". Neste libro de Ledicia Costas, Operación Macarrón, podemos ver como o peor dos días sempre pode traer algo sorprendente... ou non. Espe e Rino están xa resignados a mollarse de volta a casa cando un veciño moi xentil se ofrece a tapalos neste regreso. Si, pero non parece un veciño normal coas cellas sospeitosas, os ollos brillantes e un sombreiro que parece xirar na súa cabeza. E se é un extraterrestre? Pois nese caso haberá que facerlle como agradecemento un agasallo útil para calquera extraterrestre que teña antenas, e iso é o que Espe e Rino fan. O final do libro é do máis sorprendente e seguro que gusta a calquera neno ou nena que queira deixar voar a súa imaxinación. Unha lectura ideal para aqueles que xa comecen a facer lecturas independentes e que non se asusten con libros de trinta páxinas. A letra dun tamaño adecuado para non perderse na páxina, a lonxitude perfecta, e unhas ilustracións moi bonitas. Todo para resaltar este texto da sempre grande Ledicia Costas. Moi recomendable. Eu mesma penso lérllelo aos máis novos do meu colexio proximamente!