Neste libro infantil ambientado na fábrica de tabacos da Coruña durante a década de 1920, Manuel Rivas relátanos unha historia na que a lectura ten un protagonismo especial. A nena lectora é unha breve novela na que a protagonista, Nonó, é filla dunha familia humilde; seu pai é trapeiro e a nai misteira na fábrica de tabaco. Van vivindo aproveitando os refugallos que atopa o pai e Liberto, o seu irmán vese perseguido por opoñerse á guerra de África. El vese obrigado a emigrar para evitar a persecución e Nonó ten a oportunidade de ocupar a súa praza na escola pero esta non está preparada para recibir nenas polo que asistirá vestida de neno. A lectura é a súa pasión e, tralo falecemento de súa nai de tise polas malas condicións da fábrica, ela alegrará con historias a vida das cigarreiras e misteiras alí empregadas. Un precioso relato para situarnos nunha época que, pese a non ser tan afastada do presente, está moi esquecida. Axuda moito o texto explicativo final (que se cadra non estaba de máis ler antes de comezar o libro) que nos sitúa perfectamente e permite entender ben o contexto. Os textos de Manuel Rivas son preciosos, o argumento moi logrado dentro da súa brevidade e as ilustracións de Susana Suniaga perfectas para conseguir a ambientación que pide a historia. Non se pode pedir máis!