Óscar Reboiras Loureiro (Rianxo, 1979) estudou xornalismo en Santiago de Compostela. Dende entón traballa no mundo do márketing dixital. Un bo día decide que é o momento de escribir outro tipo de textos. Por iso se apunta a un taller de escritura impartido por Antón Riveiro Coello, do que sae o libro colectivo Liñas compartidas (2019). Ese mesmo ano publica O cronista imposible. Wenceslao Fernández Flórez. En 2022 gaña o II Premio de Novela da Galicia Rural, grazas ao cal publica A agonía das folerpas, a súa primeira novela. Cando o mundo é azul (2025) supón a súa estrea na literatura infantil tras recibir o Premio Carlos Mosteiro. Ademais deste galardón, foi finalista no Certame de Narracións Breves Manuel Murguía (2024), gañou o Certame de Microrrelatos de Vilalba (2022), o 3º premio de narrativa do concurso Literario de Ames (2021 e 2022) e o certame literario Contos arrepiantes para tremer ao carón da lareira (2020).