A miña última lectura foi Cerebro en modo ON de Sonia Villapol Salgado e debo dicir que foi toda unha sorpresa. Este libro de divulgación científica enfocado ao público xuvenil foi unha lectura que simplemente pretendía revisar e acabei lendo de principio a fin. En Cerebro en modo ON, a prestixiosa científica Sonia Villapol vai debullando cada un dos aspectos máis relevantes do noso cerebro sempre en segunda persoa e dirixíndose a un ou unha adolescente lectora. Trátanse temas como o funcionamento básico do cerebro, as súas partes, os riscos, as recomendacións, os problemas máis habituais que podemos atopar no seu funcionamento na nosa vida diaria actual. E todo cuns capítulos breves que se poden ler de forma independente. Gustoume tamén a lingua, rica, precisa e axustada aos seus potenciais lectores pero ao mesmo tempo sen perder rigor a axudada pola presenza dun glosario final por se algún termo fose obstáculo para a comprensión. As fantásticas ilustracións de Diego Estebo axudan moito pois máis que embelecer o texto recollen información en forma de gráficos e esquemas, algo moi interesante para aqueles que agradecemos este tipo de apoios. Creo que é un tipo de libro moi necesario pola súa escaseza en galego (obras de calidade, fáciles de ler e pensadas para público xuvenil) e encántame a aposta de Galaxia por obras deste tipo na colección Lanterna de Aristóteles pois nas bibliotecas escolares resulta moi difícil atopar obras deste tipo na nosa lingua. Ás veces o difícil dun tema non é expoñelo ao nivel máis alto para especialistas senón conseguir o que aquí atopamos, crear interese, explicando ben e de maneira fácil o que é moi complexo. Parabéns á autora por facer tan ben algo tan complicado!