Este libro contén cinco ensaios, dos cales dous están directamente relacionados coa cultura galega, como son o que dá título ao volume e o dedicado á Santa Compaña. A aparición de Mito e realidade da Terra Nai en 1957 supuxo un auténtico acontecemento cultural, tanto pola personalidade do autor como pola temática tratada. Rof Carballo, unha figura eminente da medicina, ben coñecido nos ambientes intelectuais españois e europeos, incorporábase así ao brillante grupo de ensaístas que en Galicia acometía daquela a tarefa de prestixiar a lingua do país. O amplo saber humanista de Rof Carballo penetra lucidamente nestas páxinas en aspectos fundamentais das culturas galega e europea.