A gran carreira anual chegou a Cienciópolis!

Os motores ruxen, o circuíto está preparado e os mellores pilotos da cidade dispóñense a competir. Mentres Lola Centella e Bruno Caparazón loitan pola vitoria, descubriremos todo o que se agocha detrás dun coche de carreiras: como se deseña e se constrúe, que papel desempeñan a aerodinámica, o motor e os pneumáticos, como actúa a forza G ou que sucede durante unha rapidísima parada en boxes.

Unha emocionante historia chea de acción que combina ficción e divulgación para achegar aos lectores máis novos á Fórmula 1, á ciencia, á tecnoloxía e á enxeñaría. Un libro sobre velocidade e tecnoloxía, pero tamén sobre amizade, traballo en equipo e deportividade.