Aínda que no momento presente as posibilidades da Internet están a ser só albiscadas, a Rede xa está a producir fondas mudanzas nos hábitos sociais, nomeadamente en todo o que atinxe aos modos de acceder á información. As Bibliotecas Dixitais son un bo exemplo do aproveitamento da potencialidade da Internet para a difusión dos contidos culturais.

Este libro pretende fornecer ao público lector unha visión de conxunto dos aspectos tecnolóxicos e sociolóxicos que teñen a ver coas Bibliotecas Dixitais. Así, tras unha primeira parte onde se explican brevemente as diferentes realidades que hoxe se recollen baixo esta denominación, as autoras centran a súa atención en cuestións de caracter máis técnico (formatos, tecnoloxía de deseño, posíbeis servizos, etc) para, finalmente, sempre desde a perspectiva multidisciplinar que orienta o libro, analizaren as características e posibilidades de tres Bibliotecas Dixitais concretas.