Acabo de ler Conecta co íntimo de David Otero e publicado en Laiovento, un poemario que desde logo responde moi ben ao título que ten. Tamén conta esta obra cunha marabillosa introdución de Marica Campo, que nos axuda a entrar nesta viaxe tan persoal que temos diante. En Conecta co íntimo o autor presenta unha invitación a centrarse no mundo interior, especialmente a través dese diálogo co interlocutor ou interlocutora e consigo mesmo. Unha invitación a saír do mundo das cousas, do ruído e vivir desde aí. E xa desde os primeiros versos: conecta co íntimo toma conciencia axústate na esencia e agárrate ben aprende E nesta viaxe o eu lírico desposúese de moitos elementos, de falsas narrativas, imposicións, e nese coñecerse báixase ao íntimo no que atopamos a verdade, os recordos, os soños, a vida. Mesmo na ausencia a palabra da interlocutora se fai beleza. E xuntos aparece esa conexión co íntimo, esa profunda e anhelada intimidade na que cabe todo e sempre de forma ilusionante: non forcemos nada gustemos de nós vivir conectemos co íntimo nos optimismos proclamaremos o desexado Nesta relación fúndense pasado, presente e futuro e atopamos un desexo de permanencia desde a escrita, pero non desde a aprobación externa. Que bonito e que ben contado!