Acaba de saír Rosalía oculta, unha obra de Paula Mayor en banda deseñada coa que nos agasalla Galaxia polo día de Rosalía deste ano. Encantáronme as ilustracións e creo que achegan moi ben a Rosalía real, fóra do personaxe e do mito que os anos foron creando a partir da súa figura. Vemos nesta obra as orixes e intereses dunha Rosalía xove, a súa peripecia vital, sempre en movemento pero atenta a todo canto a rodeaba: problemas persoais ou sociais nunha época moi convulsa. Sorprendeume favorablemente nesta obra que a autora decidise apartarse das imaxes e fotos que temos de Rosalía, para crear un personaxe propio ao que darlle unidade desde a infancia e recoñecible ao longo de todo o libro. Tamén me sorprendeu a cantidade de texto que hai en castelán pois a narración faise en boa parte da obra nas propias palabras de Rosalía ao longo das súas obras, moitas delas en castelán. Creo que para moitos de nós a súa obra en galego eclipsou os seus escritos en castelán, que aquí son usados moitas veces como parte da narración, dándolle maior verosimilitude pois, ao fin e ao cabo, son as súas verdadeiras palabras. Outro elemento que me gustou é o contido extra final: ilustracións para poemas concretos e a liña temporal da súa vida, moi útil para calquera namorado da súa obra que desexe ver como se integran vida e obra. Unha moi interesante novidade editorial que espero que teña gran acollida entre o público, novo e adulto. A min desde logo gustoume moito.