Dez gatos da casa pasaban os días ao quente da cheminea.
Unha mañá fría e pachorrenta, aburridos de estar aburridos, puxéronse a botar contas:
-Os gatos temos sete vidas. Somos dez, así que, entre todos, sumamos… SETENTA VIDAS!
E ímolas malgastar pasmando diante da cheminea?
-Ca!, Diso nada!

Dez gatos aburridos é un conto redondo. E non só pola súa estrutura circular, senón tamén pola súa equilibrada combinación de inocencia, humor, acción e aventura.
Dez gatos aburridos é tamén un conto matemático; unha invitación para xogar con sumas, restas e multiplicacións, ao longo dunha narración que reparte as súas liñas entre a tradición e a modernidade.
Este álbum, que invita á aventura grupal e á aceptación do fracaso como unha forma de aprendizaxe, promove a perseveranza e a continuidade como actitudes esenciais. E é que Dez gatos aburridos é, ante todo, un canto á vida; unha chamada a non deixala pasar sen antes espremela (aínda que saibamos que dispoñemos de sete).