Manchea é unha obra de teatro pensada para representarse con monicreques. Con este texto gañou Andrea Freire o XVI Premio Barriga Verde para teatro de monicreques na modalidade infantil. Coma en moitas outras obras, temos unha princesa da que descoñecemos o nome ata o final e que inicialmente está encerrada no castelo e gardada polo dragón Tizón. Temos tamén a Valentín que é un príncipe azul. Ata aquí todo promete un relato típico e sen grandes sorpresas pero aquí todos os personaxes, excepto o rei, pregúntanse se realmente desexan vivir encadeados ao guión que se lles presupón. Valentín queda sen o seu traxe e pasa a ser Man e a partir deste momento xa non poderá falar aínda que si expresarse ─se cadra aínda con maior forza dramática─. A partir de aquí os personaxes, especialmente os femininos, cuestionarán o papel que se espera delas, e mesmo rematarán tendo nome tanto a raíña como a princesa. As acotacións son moi útiles de cara a unha posible representación ─non no meu caso─ e o xiro que aparta a trama do máis tradicional tamén fará que o público máis novo repense os estereotipos dos contos infantís.