A miña última lectura infantil foi Alén e o dragón de Olaia Sendón, con ilustracións de Víctor Rivas e editado por Antela Editorial. Esta obra foi a novela infantil gañadora do II Certame Jaime Olmedo Limeses e esta copia achegouma a editorial estes días. Debo dicir que a edición en si en pasta dura e con numerosísimas ilustracións non pode ser máis bonita. É deses libros que entran polos ollos, algo moi importante sempre pero, especialmente, no caso do público infantil. Nesta novela Alén vive unha vida completamente normal coa súa nai e a súa cadela Miley ata que empeza a notar certos cambios e animado pola súa amiga Emma decide investigar no lugar onde cre que pode radicar a orixe do misterio, Leiraslongas, a aldea da súa bisavoa. Buscan a forma de fugarse á aldea en bus e comezar a investigar. Alí atopan a unha vella absolutamente nada común, teimuda forte e vellísima pero que conserva un segredo secular que terá que contarlle a Alén. Aprende a razón pola que súa nai perdeu o contacto con esta avoa que a criou e descobre a existencia dos dragóns e o seu enlace con mundo ordinario. Mentres tanto Emma tamén descobre o seu poder sobre as pitas, seres pouco comúns tamén. Nesta novela descubrimos animais do máis peculiares, acción e a importancia de coñecer o propio pasado aínda que, a diferenza de Alén e da avoa, os demais carezamos de superpoderes. Unha novela que cos seus personaxes interesantes, unha acción fóra do común e con eses dragóns rompe cos temas máis habituais noutras novelas infantís e seguro que gustará a nenas e nenos lectores a partir de 9 anos e ata uns 12.