As mulleres e o comercio percorre o papel fundamental das galegas como motores do abastecemento e o intercambio comercial nos séculos XIX e XX e chega ata a actualidade. Desde as prazas de abastos ata as feiras rurais, esta publicación documenta como peixeiras, leiteiras, verdureiras, entre outras ocupacións femininas, sostiveron a economía, conectando o mundo rural co urbano. Nas cidades, as mulleres levaban tendas de ultramarinos, mercerías, tendas de confección, sombreirerías. Algunhas, frecuentemente baixo a firma de «Viúva de...», garantiron a continuidade e o prestixio das empresas familiares dedicadas ao comercio ao retallo e tamén á distribución ao por maior.