ÁLEX MENE

Alejandro Mene Pazos, coñecido como Álex Mene, nado en Vigo en 1969, é un mestre, escritor, artista multidisciplinar e comisario de exposicións galego.

Licenciouse en Comunicación Audiovisual na Facultade de Ciencias da Información da Universidade Complutense de Madrid. É profesor de cultura audiovisual e fundamentos da arte no IES Alexandre Bóveda.

A súa obra aborda temas coma o desexo, a memoria, e os roles e a Identidade de xénero. Como fotógrafo e pintor expuxo en espazos tales como a Galería Espacio 48 de Santiago de Compostela, no Museo Municipal de Ourense ou no Museo MARCO de Vigo.

Pezas audiovisuais súas participaron en festivais como o Certame de curtas de Caja Madrid, o Festival de Cine Independente de Elx, o Certame de Mozos Realizadores de Zaragoza, o Rec.06, o Festival de Creació Audiovisual de Tarragona ou o Girona Film Festival.

Doutorouse en Belas Artes cunha tese sobre o labor de fotógrafo de Eduardo Blanco Amor intitulada O ollo cazador. Sobre a fotografía de Eduardo Blanco Amor.