Despois de varios días de lecturas rematei esta fin de semana Pacto de silencio de Ana Viéitez, unha novela publicada por Xerais e que sairá esta semana á venda pero que tiveron a ben agasallarme para a súa lectura. En Pacto de silencio atopamos un thriller deses que nos enganchan desde as primeiras páxinas e no que imos buscando entre os diferentes personaxes o candidato a culpable dos crimes. Hai nove anos, un home apareceu morto e, como consecuencia, Aloia acabou no cárcere acusada do homicidio. Álex saíua impune daquela, algúns outros implicados no Caso Compostela xa foron saíndo no cárcere e para Sofía, Xiana, Irene e Iago urxe investigar a relación dese crime coa cruel morte de Álex recentemente. Teñen medo pola seguridade de Aloia e pola do resto dos membros deste grupo. Sofía, que é xornalista, busca resolver este crime empregando calquera medio dispoñible pero conta coa desconfianza da inspectora que non llo ha poñer nada fácil. Os diferentes narradores vannos dando múltiples perspectivas que, capítulo a capítulo, non nos permiten pousar a novela. Os capítulos son breves e os diálogos áxiles e ben construídos, algo que axuda moito ao ritmo. Diría que o único que botei en falta nalgún momento foi unha listaxe de personaxes a fin de evitar ter que volver atrás na historia pero, polo demais, esta é unha novela clásica de investigación, na que o lector se ve completamente atrapado e a resolución final resulta inesperada (ou polo menos así foi no meu caso). O personaxe que máis me gustou? Desde logo Fita, unha muller do máis interesante e que é a única que consegue ver á Sofía real que loita pola súa amiga Aloia e coa que se establece unha bonita relación. Dá gusto ler obras debut coma esta que nos fan esperar moitas cousas boas da autora para un futuro!