📚Eses días Beatriz Cabaleiro achegoume Clover, un libro diferente ao habitual na literatura infantil galega, pois é un libro bilingüe galego-inglés pensado para rapaces de primaria que xa teñan certa competencia lectora en galego. Clover preséntanos a unha porquiña que acaba de chegar a Vila Liberdade e é acollida no equipo de baloncesto pero logo se lle presenta o problema de ser diferente. Non ten amizades pois acaba de chegar e ten unhas manchiñas diferentes ás do resto do equipo. Terá que buscar a maneira de ser aceptada no equipo a pesar desta diferenza pero para iso conta cunha adestradora que sabe manexar a situación. Este álbum ilustrado Beatriz Cabaleiro presenta a dobre páxina os textos en galego e inglés con diferente tipografía acompañados das ilustracións de Blanca Millán, que sempre son un acerto. Temos ante nós un gran libro para traballar a empatía e iniciar aos máis novos nos textos en lingua inglesa. O apoio do texto en galego é unha gran axuda pero tamén existe a posibilidade de limitarse ao texto en galego se así se desexa. Como profesora de inglés estou afeita a que as lecturas nesta lingua tanto enfocadas para primaria como para secundaria sexan maioritariamente de editoriais británicas e, dado que estas adaptacións sempre deben ter en conta o seu público, este tipo de edicións galego-inglés son todo un acerto para calquera biblioteca escolar. Ademais Aira pon á disposición dos lectores e profesorado acompañante materiais complementarios para reforzar o vocabulario clave do libro. Xa son toda unha fan de Clover!