Recentemente veu Ana Meilán polo meu centro escolar e deixou este libro que acabo de ler agora, Xertrudis precisa vacacións, un simpático libro publicado por Entre nubes y cuentos no que Xertrudis e o seu mozo Bladislavo sofren diferentes experiencias vacacionais. Esta novela é a secuela de Xertrudis busca traballo pero ambas obras poden lerse perfectamente de forma independente. Xertrudis é unha bruxa descontenta coa vida, co seu traballo no tren de ela mesma, descontenta cos nenos que lle tiran do pucho, mentres que Bladislavo é todo o contrario, sempre lle ve o bo lado á todo: nenos, comida, tempo, lugares... Nesta busca dunhas vacacións reparadoras van ter diferentes experiencias para desfrute de Bladislavo e para desgusto de Xertrudis, todas elas moi divertidas para os lectores. Xertrudis ten que probar diferentes tipos de experiencias ata atopar o seu lugar perfecto para o descanso. Moitos guiños tamén para o público de máis idade: esa nena da montaña co seu amigo cabreiro e o seu avó solitario ou o príncipe doutro planeta. Bladislavo e a súa picurruchiña son dous personaxes memorables que de seguro van ter máis aventuras e a edición con tantas ilustracións tan chulas a cargo de Agustina Mattar é sumamente atractiva para as lectoras e lectores que entren na historia. Parece unha obra destinada para un público que lea de forma independente pero que aprecie a fantasía. Posiblemente a partir duns 8 anos e ata uns 12 pero quen non teña un gran nivel lector beneficiarase das numerosas ilustracións, interliñado xeneroso e capítulos breves que animan a coller o libro. Creo que xa estou agardando unha nova historia de Xetrudis e Bradislavo!