idade crítica atenta ás potencialidades dos estudos ibéricos sen desatender os seus condicionantes históricos, xeopolíticos, institucionais e simbólicos. O capítulo máis extenso céntrase no estudo das revistas culturais, sector onde adoita pensarse que xermina a produción literaria dunha época. A das revistas constitúe unha esfera de atención que nos últimos anos ampliou a súa proxección da man dos Media Studies e os Periodical Studies. Examínanse así as mediacións e transferencias político-culturais entre Galiza e Cataluña nas revistas do período de entreguerras, con atención preferente á dialéctica centro-periferia, ás redes literarias ou á intervención de gatekeepers e outros mediadores. Aténdense así mesmo dúas cuestións previas: que é unha revista literaria e como pode analizarse. Os dispositivos metodolóxicos aquí empregados para o estudo das revistas evidencian utilidade para calquera outro obxecto de investigación situado na modernidade ou na posmodernidade e considerado baixo o prisma dos estudos ibéricos.