O traballo artesán de dous canteiros locais na construción dun elemento simbólico serve de fío de unión para esta presa de relatos enraizados na maxia da contística. Neles peregrinan personaxes tradicionais xunto con xente do común que adquire papel de protagonista.

O Milladoiro das Pozacas é espazo de crenzas, casa de seres míticos, bálsamo fronte ás dificultades da veciñanza e punto de encontro e honra para romeiros de cerca e de lonxe. O misterio da noite de Reis, as trasnadas de pícaros que se converten nun perigoso incendio, a conquista amorosa dunha princesa ou a voda de dous anfibios complementan o seu día a día milagreiro.