Na miña constante procura de lecturas para facer entre o alumnado de primaria caeu nas miñas mans este libro, A bruxa Selana, unha novela moi divertida de Alba de Evan, Xabier Domínguez e Laura Cortés, publicado na colección Minicumio de Cumio. Na bruxa Selana atopamos a esta nena, neta da bruxa Emelina e que compatibiliza a súa formación como bruxa co colexio normal, onde ten moitos amigos e amigas e outros que non o son tanto... Por suposto que chega á escola na súa vasoira, non ía ser menos, pero... fará tamén os deberes con axuda dalgunha apócema máxica? O seu compañeiro Saúl ten certas dúbidas e decide investigar pero desconfiar de Selana vai terlle un alto prezo e a nosa bruxa terá que solucionalo. O que máis me gustou deste libro é o seu ton alegre e positivo, algo que conseguen tanto o texto como as ilustracións. Alegre, sinxelo, cunha historia fácil de seguir pero que require unha boa dose de autonomía lectora, un gran libro para nenas e nenos con bo nivel de lectura e que busquen unha novela sinxela, bonita, con sentido do humor e que integre fantasía (bruxas, conxuros e á Santa Compaña). Un moi bo cóctel para horas de lectura agradable!