Os falantes como lingüistas analiza os distintos modelos coexistentes e a súa formación, os procesos de converxencia e diverxencia existentes na sociedade galega actual xunto coa tensión presente entre castelanización e tradicións propias, poñendo en correlación -a base dun corpus de entrevista- os datos biográficos, a fala e os xuízos metalingüísticos dunha serie de persoas: locutores de radio e televisión galegas, profesores de galego e estudiantes de Filoloxía Galega; todos eles procedentes de variados estratos sociais e lingüísticos, desde grupos altamente castelanizados ata grupos practicamente monolingües en galego.Para Xosé Luís Regueira, profesor da Universidade de Santiago, esta traducción do li-bro do profesor alemán Johannes Kabatek, "é unha fonte riquísima de suxestións e propostas (ás veces explícitas) de novos estudios, de novas posibilidades de afondar no coñecemento do funcionamento real e actual da lingua galega na sociedade. Agora o que resulta urxente é seguir eses vieiros, porque coñece-la situación da lingua na sociedade é un paso indispensable para podermos actuar máis eficazmente na súa defensa. De aí a importancia que Xerais decidise publicar esta traducción, facendo posible que saíse do círculo de especialistas que coñecen a lingua alemana e que chegue non soamente ós sociolingüistas, senón a tódolos interesados na recuperación da lingua galega como lingua habitual nos intercambios da sociedade urbana moderna en que vivimos.