Esta novela, O conserxe de Xosé Luís Vázquez Somoza, saída hai varios anos foi un éxito no noso club de lectura xuvenil pola súa temática ambientada nun IES imaxinario da cidade de Lugo. Oín que vén de sacar a súa quinta edición, algo que vén a confirmar que hai máis lectores aos que lles encheu tamén o ollo. Tras aparecer morta unha alumna de bacharelato, e ante as inconcluíntes investigacións policiais, Eliseo, o conserxe do instituto, decide comezar pola súa conta unhas indagacións que resolvan o misterio. A figura dun conserxe está ben elixida pois é desas figuras que nos centros educativos recibe confidencias tanto de alumnado coma de profesorado e ten acceso en moitos casos a información relativamente sensible. E así, aproveitando este feito, Eliseo bótase a xuntar datos de aquí e de acolá ata que consegue encaixar as diferentes pezas do crebacabezas. Ao longo da lectura, vemos a vida do centro escolar, as relacións entre o profesorado, profesorado-alumnado, e as variadas relacións que se establecen entre o alumnado: acoso, malas influencias, repercusión da problemática familiar no rendemento escolar... Finalmente, anque o lector nunca dubida das habilidades do conserxe, chegamos á resolución, que a min polo menos logrou sorprenderme bastante. Unha lectura moi entretida que consegue que se enganche o lector e dá moito que falar despois.