Esta última lectura infantil que acabo de facer é O meu pesadelo favorito co que María Solar obtivo o Premio Lazarillo en 2014 e que atopamos publicado na colección Árbore de Galaxia. Esta novela preséntanos a Manuel, un neno que ten febre e ve como a suba da temperatura combinada coa medicación veterinaria para cans e gatos vai facendo o seu efecto levándoo a un sono moi especial. Neste sono vanse encadeando uns sonos con outros sen que resolva ningunha das situacións que se lle presentan mentres procura fuxir de Alicia, a repartidora de bicos. Atópase logo en situacións do máis surrealista, cun extraterrestre cheirento, con animais imposibles coma entre outros os Dinorrinco e Hipodrilo creados polo doutor Ensaio, uns cans verdes ou os habitantes dun bar moi especial. Unha morea de personaxes e situacións que vai deixando pendentes e das que terá que saír coa axuda de Alicia, que non é como el pensaba. Mesmo seu pai acabará aparecendo nos soños. Aínda que nalgún momento tiven a sensación de que as diferentes historias eran demasiado inconexas, chegando a ser case un libro de relatos, o final do libro consegue dar esa unidade a todo e atopámonos cun final moi bonito e luminoso no que Manuel sae airoso deste episodio de enfermidade e febre. A conclusión para min é clara, cando teña febre no futuro hei procurar non tomar medicación veterinaria por se acaso! Un libro fácil de ler por capítulos pois estes teñen certa independencia e interese coa cantidade de criaturas e situacións surrealistas que gustarán ás nenas e nenos máis imaxinativos. Por esa razón creo que aínda que vén recomendado a partir de 10 anos, podería ser interesante incluso a idades lixeiramente inferiores.