Estes vindeiros días vai saír á venda A eiruga rabuda de Antía Yáñez publicado en Xerais. Este libro infantil é deses libros para público novo que desexe historias breves pero ben contadas. Coma calquera eiruga a eiruga Rabuda quere facerse bolboreta. Ela que, a diferenza das súas compañeiras, non é de cores bonitas, ten a esperanza de que a metamorfose da adolescencia eiruguil acabe facendo dela unha preciosa bolboreta. Cando descobre que non é así tampouco no seu caso, que segue sendo unha branca eiruga cuberta de puntiños negros, decide percorrer mundo ─ou máis ben zoo─ e visitar xunto co seu amigo o rato Arrebato as outras zonas do zoo. Alí coñece outros animais e aprende deles. Como na propia vida, todo o que imos aprendendo sempre pode ter unha utilidade futura que o público novo vai desfrutar descubrindo. Un precioso libro a cabalo entre álbum ilustrado e libro tradicional para eses lectores que se estrean cos seus primeiros libros de pouco texto e moito apoio visual ou para aqueles que conten con algunha persoa voluntaria para facer esa lectura, neste caso facilmente dramatizable. Creo que é un libro que vai encantar e as coloridas ilustracións de Iván R. son perfectas: alegres, potentes e atractivas, para o relato dunha eiruga alegre, potente e atractiva, aínda que ela pense que non. Que gusto este novo libro de Antía Yáñez! Vai ser unha das miñas vindeiras lecturas cos máis pequenos do meu colexio.