Ramón Alberto Trigo Alonso, coñecido como Ramón Trigo, nado en Vigo en 1965, é un escritor, artista plástico (pintura, escultura...) e ilustrador galego.

De formación artística autodidacta, con dezaoito anos os seus cómics xa se publicaban no Faro de Vigo, en 1984 participa na súa primeira mostra colectiva de cómic na Universidade Popular de Vigo e a súa primeira exposición individual foi na Casa da Cultura de Vigo en 1990. Realizou exposicións individuais de pintura en Vigo, Nigrán, Ferrol, Valdoviño, Noia, Madrid, Santiago, Lanzarote, Bruxelas, Cuenca, A Coruña, Coimbra, Italia etc. E tamén participou en numerosas exposicións colectivas en España e Portugal. En 2022 levou a súa experiencia creativa a Nixeria a través da Embaixada de España.

É un artista polifacético, alterna a pintura e a escultura coa ilustración, o cómic, a animación… Traballa moito o debuxo e a pintura, interesándose sobre todo pola figura humana (espidos), a paisaxe (mariñas) e o bodegón. Ten nove obras na Colección Afundación.