Todos temos libros que son parte da nosa vida e este é un dos que forma parte da miña e mais da dos meus fillos. O mago Antón vive no bosque rodeado de árbores e animais pero está algo só e decide levar unha folla que lle falou para a súa casa. Pona a secar, cóidaa e o tempo vaille devolver os seus desvelos coa chegada de Antía. Unha historia sinxela pero que, polo menos na miña casa, deu para moitas lecturas. Ademais do texto de Toño, as ilustracións de Suso Cubeiro abren un mundo de animais que enriquecen enormemente o texto. A maiores, ao final do libro atopamos unha guía coa imaxe e o nome de cada criatura, así que tamén temos unha pequena guía de natureza para as saídas ao campo. Todo un acerto porque nada mellor ca unha lectura para animar a saír e coñecer a natureza e o contorno. Un libro deses que se gardan ao longo dos anos igual que o mago Antón gardou a folla!