Sandra Cisneros, nada en Chicago (Illinois) o 20 de decembro de 1954, é unha escritora estadounidense. Na súa obra ten pegada a cultura mexicana. É coñecida polas novelas A casa de Mango Street e Caramelo.

Única muller de seis irmáns, sendo nena a súa familia mudouse con frecuencia, vivindo en varios pisos no South Side de Chicago. En 1976 obtivo o Bacharelato en literatura inglesa na Universidade Loyola Chicago. Matriculouse nun programa de posgrao en escritura creativa na Universidade de Iowa, e gañou un título de mestrado en escritura creativa en 1978. Recibiu unha bolsa do National Endowment for the Arts en 1982, que lle permitiu pasar un ano no Instituto Mihály Károlyi de Vence (Francia). Traballa como directora de literatura no Centro de Artes Culturais Guadalupe de San Antonio (Texas) e en Porto Rico.